અસંખ્ય છે આરઝૂ જીવનમાં અને જગતમાં હું એકલો છું,
બીજી નજરથી જુઓ તો, સાથી કોઇ નથી ને હું કાફલો છું.
જીવનની મારી જે સ્થિર દશા છે એ મારી તદબીરની પ્રભા છે,
જરુર તકદીરની નથી જ્યાં હું એ અચળ ધ્રુવ તારલો છું.
મુસીબતોમાં કવન છે મારું, મુસીબતોમાં કલા છે મારી,
ઘટાનું ગર્જન સુણીને ગહેકે, હું મસ્ત મનનો એ મોરલો છું.
પ્રણયનો આરંભ જેમ નિષ્ફળ, પ્રણયનો અંજામ એમ નીરસ,
હતાં એ મોસમ વિનાની વર્ષા, અને હું રણ પરનો મેહલો છું.
ઓ પ્રેમ, એને બધોયે હક છે ભૂંસી શકે છે નિશાન મારું,
લલાટના લેખ કઇં નથી હું, લલાટ નો હું તો ચાંદલો છું.
ભર્યા છે "બેફામ" મોતી મનમાં, વીણીને લાવું છું એ નયનમાં,
ઊડે છે જે માનસરને લઇને, સદા નો તરસ્યો એ હંસલો છું.
"બેફામ"